Kísill er náttúrulegt efni sem finnst víða í umhverfinu og einnig í mannslíkamanum. Undanfarin ár hefur kísill vakið áhuga vísindamanna vegna mögulegra tengsla við uppbyggingu og eiginleika húðarinnar.
Hvað segja rannsóknir um kísil og húð?
Í nokkrum smærri klínískum rannsóknum hafa ákveðin form kísils verið rannsökuð með tilliti til áferðar, rakastigs og teygjanleika húðar.
Í rannsókn Barel og samstarfsfólks (2005) tóku 50 konur með sólskemmda húð þátt í 20 vikna rannsókn. Konurnar fengu annaðhvort kísil í formi kólínstöðgaðrar ortókísilsýru (ch-OSA) eða lyfleysu. Niðurstöðurnar sýndu meðal annars jákvæðar breytingar á mælikvörðum fyrir grófleika húðar og vélræna eiginleika hennar hjá hópnum sem fékk kísil.
Í yfirlitsgrein Araújo og samstarfsfólks (2016) voru teknar saman rannsóknir á mismunandi formum kísils og mögulegum tengslum hans við húð og hár. Höfundarnir bentu á áhugaverðar niðurstöður, en lögðu jafnframt áherslu á að frekari klínískar rannsóknir væru nauðsynlegar.
Þessar niðurstöður gefa tilefni til frekari rannsókna, en ekki er hægt að yfirfæra þær sjálfkrafa á allar tegundir kísils eða fæðubótarefni sem innihalda kísil.
Kísill, exem og psoriasis
Exem og psoriasis eru húðsjúkdómar sem geta haft áhrif á lífsgæði fólks. Þótt kísill hafi verið rannsakaður í tengslum við eiginleika húðarinnar liggja ekki fyrir nægilegar klínískar sannanir fyrir því að inntaka hans eða staðbundin notkun geti meðhöndlað þessa sjúkdóma.
Mikilvægt er að greina á milli rannsókna á almennum eiginleikum húðar og rannsókna á meðferð tiltekinna húðsjúkdóma.
Ef þig vantar hjálp við val á vöru er hægt að hafa samband í gegnum tölvupóst geosilica@geosilica.com